Akreditohen për periudhë 3-vjeçare dy programe trajnuese për mësimdhënës mbi metodologjinë “Të nxënit përmes përvojës”

Ministria e Arsimit, Shkencës, Teknologjisë dhe Inovacionit (MAShTi) ka akredituar për periudhë trevjeçare (2025 – 2028) dy programe për zhvillim profesional të mësimdhënësve:

• Programi trajnues për mësimdhënës mbi metodologjinë “Të nxënit përmes përvojës”
• Programi trajnues për mentorë të metodologjisë “Të nxënit përmes përvojës”

Këto programe janë zhvilluar në partneritet me Fakultetin e Edukimit të Universitetit të Prishtinës “Hasan Prishtina”, duke ndërthurur ekspertizën akademike me përvojën praktike në terren.

Procesi i akreditimit është realizuar në bashkëpunim me Institutin për Hulumtim dhe Zhvillim të Arsimit, në kuadër të Fakultetit të Edukimit – UP, duke garantuar përputhshmëri të plotë me standardet kombëtare për zhvillim profesional të mësimdhënësve në Kosovë.

Programi për mësimdhënës synon ngritjen e kapaciteteve profesionale të mësimdhënësve dhe edukatorëve në përdorimin e metodologjive efektive të mësimdhënies, me fokus të veçantë në metodologjinë “Të nxënit përmes përvojës”. Përmes kësaj qasjeje, programi kontribuon në përmirësimin e cilësisë së procesit të mësimnxënies në klasë, duke promovuar përfshirjen aktive të nxënësve, reflektimin e strukturuar dhe ndërlidhjen e teorisë me praktikën dhe jetën e përditshme.

Ndërsa programi për mentorë është i orientuar drejt ndërtimit të kapaciteteve brenda shkollave, duke përgatitur mësimdhënës mentorë që do të mbështesin, udhëheqin dhe mentorojnë kolegët e tyre në zbatimin cilësor të kësaj metodologjie.

Për më shumë informata rreth përmbajtjes së programeve dhe mënyrës së përfshirjes, ju lutemi të na kontaktoni ose të na përcillni në rrjetet tona sociale.