Jeta Xharra

Jeta Xharra është themeluese dhe drejtoreshë e Rrjetit Ballkanik për Gazetari Investigative (BIRN) në Kosovë, si dhe moderatore dhe redaktore e emisionit televiziv “KALLXO Përnime”, i cili transmetohet në TV Dukagjini. Ajo themeloi emisionin “Jeta në Kosovë”, i cili trajtonte çështje aktuale, tema tabu dhe gazetari investigative, dhe u transmetua në RTK për më shumë se 15 vjet. Përmes këtij emisioni, Xharra krijoi një format të ri të gazetarisë hulumtuese, që kishte për qëllim jo vetëm raportimin, por edhe luftën për një të ardhme më të mirë.

Ky format i gazetarisë hulumtuese dhe i verifikimit të fakteve u eksportua edhe në vendet fqinje, dhe së fundmi Xharra transmetoi emisionin “Jeta në Maqedoni” në televizionin publik të Maqedonisë së Veriut. Xharra gjithashtu themeloi revistën Prishtina Insight, e cila ofron lajme dhe analiza të thelluara nga Kosova në gjuhën angleze për audiencat e huaja.

Si një trajnere e njohur e gazetarisë investigative, Xharra ka trajnuar gjithashtu gazetarë dhe aktivistë të shoqërisë civile në Liban, Pakistan dhe Ukrainë.

Ajo filloi karrierën në gazetari në mars të vitit 1998 si pjesë e ekipit të BBC, që arriti të siguronte pamjet e vetme ekzistuese të sulmit mbi familjen Jashari në Prekaz. Gjatë gjithë luftës, ajo punoi si producente lokale për BBC në Kosovë, Maqedoninë e Veriut dhe Shqipëri.

Pas luftës, Xharra përfundoi një master në Studime Lufte në King’s College London në Mbretërinë e Bashkuar dhe një tjetër master në Skenaristikë nga London College of Printing. Ajo u kthye në Kosovë në vitin 2003 dhe hapi zyrën e Kosovës për Institutin për Raportim të Luftës dhe Paqes (IWPR) me qendër në Londër. Brenda rajonit, ky institut më vonë u shndërrua në BIRN, të cilin Xharra e themeloi së bashku me pesë kolegë rajonalë.

Në vitin 2012, Organizata e Mediave të Evropës Juglindore (SEEMO) i ndau Xharrës çmimin “Dr. Erhard Busek Award for Better Understanding in South East Europe”, ndërsa në vitin 2021 ajo fitoi vendin e parë në gazetarinë investigative nga Komisioni Evropian. Ajo është përmendur gjithashtu si burim i raportimit për korrupsion nga Departamenti i Shtetit i SHBA në vitet 2020 dhe 2021.