Rezultatet Kryesore nga dy Kampet e Punësueshmërisë

26 Dhjetor, 2025

Në dy kampet e punësueshmërisë, pjesëmarrësit ndanë përshtypjet e tyre rreth përvojës së fituar përmes pyetësorëve vlerësues para dhe pas kampit.

Pjesëmarrësit vijnë nga 13 komuna të Kosovës: Obiliq, Ferizaj, Vushtrri, Fushë Kosovë, Gjilan, Prishtinë, Istog, Deçan, Pejë, Malishevë, Skënderaj, Podujevë dhe Kamenicë, duke reflektuar një shpërndarje të gjerë gjeografike.

Në të dy kampet, dominon pjesëmarrja e gjinisë mashkullore me 61%, ndërsa gjinia femërore përfaqëson 39% të pjesëmarrësve. Shumica e tyre i përkasin grupmoshës 18-22 vjeç, çka tregon përfshirjen kryesisht të të rinjve të sapodiplomuar ose në fazat e hershme të kërkimit të punës.

Janë përdorur tri metoda statistike për nxjerrjen e rezultateve:

Analiza e korrelacionit
Analiza e regresionit
Analiza ANOVA

Analiza e korrelacionit tregon se në të dy kampet ekziston një lidhje pozitive midis vetëbesimit, njohurive dhe aftësive për punësim. Sa më të larta të jenë njohuritë dhe vetëbesimi i pjesëmarrësve, aq më të zhvilluara janë edhe aftësitë e tyre profesionale.

Analiza e regresionit tregon se, në të dy kampet, njohuritë mbi shërbimet e punësimit janë faktori më i fortë ndikues në përmirësimin e aftësive të punësimit.

Ndërkohë, rezultatet e analizës ANOVA tregojnë dallime të rëndësishme statistikisht në aftësitë e punësimit sipas nivelit të vetëbesimit. Vetëbesimi i lartë shoqërohet me aftësi më të zhvilluara profesionale.

Rezultatet e kombinuara të dy kampeve tregojnë se pas ndërhyrjes:

Pjesëmarrësit e të dy kampeve kanë përfituar ndjeshëm në aspektin e aftësive për punësim, vetëbesimit dhe motivimit;
Kampi ka ndikuar pozitivisht dhe drejtpërdrejt në përgatitjen profesionale të të rinjve;
Njohuritë për shërbimet e punësimit janë përmirësuar, por mbeten një fushë ku nevojiten më shumë trajnime dhe informim;
Lidhjet statistikisht të rëndësishme dëshmojnë se ndërhyrje të tilla kanë ndikim real dhe të matshëm.

Ky projekt implementohet nga OJQ TOKA dhe mbështetet nga Qeveria Gjermane përmes GIZ Kosovo.