7 komuna, mijëra suksese – Rezultatet e mahnitshme të Ditës së Solidaritetit 2024!

Dita e Solidaritetit, një nga aktivitetet më të dashura për ne, u implementua përsëri në vitin 2024 me shumë sukses dhe përkushtim. Ky projet promovon angazhimin e të rinjve, të cilët për një ditë punojnë në një biznes lokal dhe pagën e tyre e dhurojnë për një kauzë të caktuar.

Koncepti i Ditës së Solidaritetit është një risi për Kosovën, pasi që për herë të parë u implementua në qershor të vitit 2023, në Komunën e Prishtinës dhe disa komuna përreth.

Pas rezultateve të shkëlqyera të  vitit 2023, vendosëm që Ditën e Solidaritet ta shpërndajmë edhe në komuna të tjera të Kosovës në vitin 2024. Në Ditën Ndërkombëtare të Vullnetarizmit 5 dhjetor 2023, në bashkëpunim me Ministrinë e Kulturës Rinisë dhe Sportit, Komuna e Kamenicës dhe Skënderajt realizuan pilot-projektin e  Ditës së Solidaritetit duke i hapur rrugën edhe shumë komunave të tjera këtë vit.

Në muajin mars të këtij viti, solidarë u bën edhe Komunat e Ferizajt, Gjakovës, Hanit të Elezit,  Istogut, Pejës, Podujevës dhe Skenderajit, ku na dhanë dritën e gjelbër për të vazhduar punën dhe gjithsej angazhuan: 190 vullnetarë, në 60 biznese dhe grumbulluan 3343 euro.

Shkollat e Mesme: “Aleksandër Xhuvani” në Podujevë, “Bedri Pejani” në Pejë, “Elena Gjika” në Ferizaj, “Dardania”në Han të Elezit, “Haxhi Zeka” në Istog, “Hamëz Jashari” në Skënderaj, “Kadri Kusari” në Gjakovë me ndihmën e 16 mësimdhënësve dhe 7 mentorëve e filluan rrugëtimin e tyre me punëtoritë përgatitore.

Për të siguruar përgatitje të plotë dhe kuptim të konceptit të Ditës së Solidaritetit, u zhvilluan nga dy punëtori në secilën komunë pjesëmarrëse, duke u realizuar gjithsej 14 punëtori. Përmes aktiviteteve argëtuese, nxënësit mësuan më shumë për njëri-tjetrin dhe për aspektet kryesore të Ditës së Solidaritetit.

Pas marrjes së të gjitha informatave, puna filloj dhe nxënësit u akomoduan në bizneset e caktuara. Të gjitha komunat me shumë zell dhe përkushtim implementuan Ditën e Solidaritetit dhe arritën suksese me këto rezultate.

• Në Komunën e Ferizajt u angazhuan 30 vullnetarë në 6 biznese partnere dhe grumbulluan 600 euro;
• Në  Komunën e Gjakovës u angazhuan 25 vullnetarë në 5 biznese partnere dhe grumbulluan 310 euro;
• Në komunën  e Podujevës u angazhuan 29 vullnetarë në 4 biznese partnere dhe grumbulluan 355 euro;
•  Në komunën e Pejës u angazhuan 30 vullnetarë në 15 biznese partnere dhe  grumbulluan 914 euro;
•  Në komunën e Hanit të Elezit u angazhuan 31 vullnetarë në 15 biznese partnere dhe grumbulluan 539 euro;
•  Në komunën e Istogut u angazhuan 22 vullnetarë në 6 biznese partnere dhe grumbulluan 379 euro;
• Në komunën  e Skënderajt u angazhuan 29 vullnetarë në 9 biznese partnere dhe grumbulluan 337 euro. 

Energjia e mrekullueshme e vullnetarëve, mësimdhënësve dhe mentorëve dhanë rezultate të mbresëlënëse, kurse bizneset me mikëpritjen dhe kujdesin maksimal krjuan një ambient ku vullnetarët fituan shkathtësi të reja.

Nxënësja Rina Jaka nga Ferizaji ka potencuar:

“Shkathtësitë që unë i përfitoj sot prej kësaj dite janë, shkathtësia e punës, sjellja me klientë, poashtu dhe renditjen e barnave e cila është një fushë që veçse jam duke e studiuar”.

Shkathtësitë e fituara nuk ishin avantazhi i vetëm që nxënësit morën. Falë punës së tyre, 37 biznese partnere hapën dyert e tyre, për vullnetarët që punuan në Ditën e Solidaritetit dhe u ofruan vende pune, ku 30 prej tyre tashmë kanë filluar punën.

Pas kësaj eskperience të paharrueshme, vlerësuam se vullnetarët tanë meritojnë një shpërblim për energjinë dhe zellin e tyre, andaj realizuam 7 ekskurzione për vullnetarët pjesëmarrës në Ditën e Solidaritetit në 7 komuna. Qëllimi i këtyre ekskurzioneve përpos argëtimit ishte edhe reflektimi. Përmes aktiviteteve reflektuese  analizuam gjithë përvojën e pjesëmarrësve nga fillimi e deri tek implementimi.

Dita e Solidaritetit është dëshmuar edhe njëherë të jetë një ngjarje e jashtëzakonshme, duke treguar fuqinë e komunitetin dhe dedikimin e rinisë tonë.

Suksesi i kësaj ngjarjeje është provë e punës së palodhshme dhe entuziazmit të të gjithë akterëve të përfshirë. Ndërsa planifkojmë për të ardhmen, bazat e vendosura këtë vit premtojnë ndryshime dhe zhvillime pozitive, duke siguruar një trashëgimi të qëndrueshme solidariteti dhe mbështetjeje.

U jemi falenderues 7 komunave dhe të gjithë akterët e përfshirë, puna e të cilëve na ka bashkuar në këto suksese të jashtëzakonshme, pavarësisht diversitetit të tyre.

Dita e Solidaritetit është pjesë e aktiviteteve ambientaliste të Agjencisë Suedeze për Bashkëpunim dhe Zhvillim Ndërkombëtar (SIDA), përmes Programit të saj Human Rightivism që implementohet nga Community Development Fund – CDF dhe TOKA; mbështetet nga Ministria e Kulturës, Rinisë dhe Sportit dhe nga granti rajonal i “SMART Balkans – Shoqëria Civile për Vlera te Përbashkëta në Ballkanin Perëndimor” zbatuar nga Centar za promociju civilnog društva (CPCD), Qendra për Kërkime dhe Krijimin e Politikave (CRPM) dhe Instituti për Demokraci dhe Ndërmjetësim (IDM) dhe i mbështetur financiarisht nga Ministria e Punëve të Jashtme Norvegjeze (NMFA).  Ky projekt zhvillohet në bashkëpunim me rrjetin e organizatave SAME.