Bursa “LULËZOJNË”

Programi i bursave “LULËZOJNË” nga TOKA është një iniciativë që synon të mbështesë të rinjtë e Kosovës që kanë potencial, motivim dhe dëshirë për të ndikuar pozitivisht në komunitetin e tyre, por që përballen me sfida financiare apo sociale në rrugëtimin e tyre akademik. Përmes kësaj burse, TOKA ofron jo vetëm mbështetje financiare për studimet universitare, por edhe mundësi për zhvillim personal, profesional dhe angazhim qytetar. “LULËZOJNË” është krijuar për të fuqizuar të rinjtë nga komunitete të ndryshme – veçanërisht ata nga zonat rurale, grupet e margjinalizuara dhe studentët e gjeneratës së parë – duke u dhënë hapësirë të rriten, të zhvillohen dhe të bëhen liderët e së ardhmes. Çdo bursë siguron deri në €1,000 për të mbuluar shpenzimet e shkollimit, akomodimin, materialet e studimit dhe shpenzimet esenciale – duke mundësuar që fituesit të përqendrohen plotësisht në arsimimin e tyre dhe ndikimin në të ardhmen.

• Bursa “LULËZOJNË me ISA Consulting Group” – 11 studentë të vitit të tretë në fushën e IT-së, të mbështetur nga ISA Consulting Group.
• Bursa “LULËZOJNË me Mehmet Gjevori” – 2 studente femra nga zonat rurale, të pasionuara për edukimin, ligjin, gjuhën shqipe dhe vullnetarizmin, të mbështetur nga Familja Xharra.
• Bursa “LULËZOJNË me Fatlinda Drejta-Karahoda” – 3 studente femra në farmaci, mjekësi, kimi ose shkenca natyrore, të mbështetur nga Jehona & Era Gjurgjeala.
• Bursa “LULËZOJNË me Innovative Solutions” – 1 studente e vitit të tretë në FIEK, e cili përfiton gjithashtu nga një praktikë profesionale në kompani, e mbështetur nga Innovative Solutions.
• Bursa të hapura – 5 studentë pa një profil të caktuar, siç është kërkuar nga donatorët, të mbështetur nga ALSA UK, VLERA, Betim Deva dhe Flutra Osmani dhe donatorë të tjerë individualë.

“Jam shumë mirënjohëse për këtë mundësi, sepse bursat e tilla motivojnë studentët të vazhdojnë rrugëtimin e tyre me më shumë besim. Mendoj se kjo bursë është një mbështetje e madhe për ne studentët që punojmë fort për të ardhmen tonë.” – Lorika Hajdari – përfituese e bursës “LULËZOJNË x Isa Consulting Group”

“Bursa do të më ndihmojë të paguaj shpenzimet bazike të një studenti, si banimi, ushqimi, librat dhe materialet për provime, si dhe transporti, e po ashtu të marr pjesë në ndonjë konferencë.” – Albana Ajvazi – përfituese e bursës “LULËZOJNË x Fatlinda Drejta Karahoda”

“Bursa ‘Lulëzojnë’ ka qenë sinjal se vullneti i mirë sjell të mira dhe herët a vonë shpërblehet. Po ashtu, ka qenë inkurajim që të vazhdoj përpjekjet e mia për të pasur ndikim pozitiv në shoqëri.” – Kaltrina Bunjaku – përfituese e bursës “LULËZOJNË x Innovative Solutions”

“Bursa më ka lehtësuar shpenzimet dhe më ka ndihmuar të fokusohem më mirë në studime. Jam shumë mirënjohëse për këtë mundësi, sepse më ka motivuar dhe më ka mbështetur në rrugëtimin tim akademik.” – Anda Hoxha – përfituese e bursës “LULËZOJNË”