Projekti “Rinia për Podujevën” përmbyllet me sukses të jashtëzakonshëm!

Klubi i Super Vullnetarëve “Alfa”, i udhëhequr nga Dardana Veliu në shkollën “Kongresi i Manastirit” gjatë dy muajve u fokusua në modulin e Mjedisit, ku mësuan më shumë për mbrojtjen dhe ndikimin e tij në mënyrën e jetesës tonë. Gjithashtu ata kuptuan metodat dhe idetë për mbrojtjen e mjedisit dhe se si mund t’i zbatojnë këto metoda në shtëpitë dhe komunitetet e tyre.

Në fund ata zhvilluan një projekt të Vullnetarizmit Edukativ rreth modulit të Mjedisit, ku rregulluan një klasë verore së bashku me karrige dhe banka dhe e pajisën edhe me reflektorë të ndriqimit.

Elita, një Super Vullnetare entuziaste, theksoi rritjen e aftësive të tilla si bashkëpunimi në grup, të menduarit kritik dhe lidershipi gjatë zbatimit të projektit. Ajo gjithashtu zotëroi përdorimin e pajisjeve të kompresorit për ngjyrosje, duke treguar përkushtimin dhe entuziazmin e saj.

Këshilli i prindërve, i udhëhequr nga Burim Osmani, dhe stafi teknik i shkollës luajtën një rol vendimtar gjatë procesit të ngjyrosjes, duke ndihmuar me përkushtim gjatë zbatimit të projektit. Përveç kësaj, ata siguruan edhe ushqim për Super Vullnetarët gjatë ditëve të punës.

Projekti “Rinia për Podujevën” është një dëshmi e ndikimit pozitiv të bashkëpunimit të komunitetit dhe angazhimit të të rinjve. Ndërsa reflektojmë për të arriturat, presim me padurim iniciativa të mëtejshme që do të kontribuojnë në përmirësimin e jetës së të rinjve në Podujevë.

E falenderojmë shumë Drejtorinë e Kulturës, Rinisë dhe Sportit e komunës së Podujevës, me drejtorin Pajtim Balaj për mbështetjen financiare të këtij projekti.