TOKA në skenën ndërkombëtare – Saranda përfundon programin për inovacion dhe menaxhim në Vjenë

Saranda Murturi, Menaxhere e Programit të Edukimit Formal në TOKA, ka përfunduar me sukses pjesëmarrjen në Programin katërmujor për Inovacion Social dhe Menaxhim, i cili u mbajt në Vjenë dhe u organizua nga Akademia e OJQ-ve në bashkëpunim me Universitetin e Biznesit në Vjenë (WU Vienna) dhe Fondacionin ERSTE.

Ky program prestigjioz i zhvillimit profesional përzgjedh çdo vit vetëm 25 përfaqësues të OJQ-ve nga Evropa Juglindore dhe Qendrore, duke u ofruar atyre një qasje të avancuar ndaj menaxhimit të OJQ-ve, inovacionit social, lidershipit dhe marketingut. Qëllimi i tij është jo vetëm të fuqizojë aftësitë individuale të pjesëmarrësve, por edhe të ndërtojë ura bashkëpunimi mes organizatave në rajon.

Saranda ishte pjesë e gjeneratës së 12-të të këtij programi, e cila kaloi përmes tre moduleve intensive trajnimi, të udhëhequra nga ekspertë ndërkombëtarë. Trajnimet përfshinë temat më të avancuara në fushat e menaxhimit të inovacionit, design thinking, menaxhimit të projekteve, vlerësimit financiar dhe matjes së ndikimit, ngritjes së fondeve, marketingut strategjik dhe lidershipit.

Me përfundimin e këtij programi, Saranda sjell në sektorin e edukimit dhe zhvillimit të OJQ-ve në Kosovë njohuri të reja, përvoja ndërkombëtare dhe ide të freskëta për rritjen e ndikimit dhe efikasitetit të iniciativave sociale.

“Pjesëmarrja në këtë program ka qenë një përvojë jashtëzakonisht e vlefshme. Përveç përfitimit të njohurive praktike dhe të avancuara, ajo që e bëri më të veçantë ishte mundësia për të parë nga afër perspektiva të ndryshme dhe për të qenë pjesë e një rrjeti profesionistësh të përkushtuar nga i gjithë rajoni.” – Saranda rreth pjesëmarrjes

Fotografi: Igor Ripak